भगवन की थिक दोष हमर
भगवन की थिक दोष हमर
केहि अपराध नाथ बिसराओल
हम तँ जनम जनम केर सेवक
केहि अवगुण लेल नाथ सताओल
की कही हम कोना रहै छी
अहाँ विरह में कोना जीबै छी
अहाँ कखन धरि आँखि नुकायब
हमरा दिस सँ मुंह घुमायब
हमहुँ ढीठ बड़ पैघ अहीं सन
चौखट छोरि कतहुँ नहिं जायब
भगवन की थिक........
भेल होई जौं उलट कर्म किछु
सादर चरण में सब समर्पित
गुण अवगुण के बोध ने हमरा
जौं रहितए त भटकि तौं किआ
भवसागर में छी बौराअल
भगवन जूनि करू देर, राह देखाउ
भगवन की थिक........
सब प्रकार प्रभु समरथ अहाँ
लै दुखड़ा हम जाऊं कहाँ
बेरि बेरि अहाँ जांच जे ले लौं
नाम अहीं लै पार भेलौं
आब कृपा करू समरथ स्वामी
दोष बिसारि शरण लिअ स्वामी
भगवन की थिक.........
कण-कण में प्रभु अहीं छी व्यापल
तइओ आकुल नैन अभागल
सजल नैन रहे दिवस रैन प्रभु
आकुल मनुआ तनिको ने चैन प्रभु
दरस भेटत सब कष्ट कटत
सोचि मुदित आनंद मगन छी
अछि मतिमन्द सानंद 'शुभेश'
जूनि तरपाऊ करू कृपा विशेष।।
कोई टिप्पणी नहीं:
एक टिप्पणी भेजें